Urte honetan ere Bilblogari lehiaketa gaztea martxan duzue, Bilboko gazte euskaldunei zuzenduriko blog lehiaketa. Bilboko Udalarekin batera, aurten ere, Nontzeberrik euskara sustatzeko ekimen hau abiarazi du interneten. Euskarazko blogik interesgarrienak sarituko ditugu.

 

 

 

BASEAK

Bilboko Udaleko Euskara Sailarekin elkarlanean, Nontzeberri kultura atariak BilBlogari Bilbo Handiko 15 eta 35 urte bitarteko gazte euskaldunei zuzenduriko blog lehiaketa abiatu du. Ekimenaren helburua, euskara, gazteak eta teknologi berrien uztarketa sustatzea da, beti ere euskararen erabilera gazteen artean areagotzeko asmoz.
Lehen aipaturiko bi entitateek Bilboko gazteen blog lehiaketarako deialdia egin dute honako baldintzei begira:
• Lehiaketan nahi duen orok esku hartu ahalko du, beti ere Bilbokoa bada edota Bilbo hiriarekin lotura ezinbestekoa baldin badu. Parte hartzea doakoa da.
• Lehiaketan hiru atal izango dira: blog pertsonalak, taldeko blogak, eta blog tematikoak. Atal bakoitzean Interneteko bitakora onena sarituko da. Bloga egiterakoan eta elikatzerakoan dituzuen ideiak, irudimena eta abilitatea baloratuko dira. Zenbat eta gehiago idatzi orduan eta hobeto.
• Parte-hartzaileak kategoria hauetan har dezake parte nahi beste blogekin, baina blog bakoitza atal bakarrean lehia daiteke. Mila modu eta mila gai dituzue berba egiteko euskaraz.
• Blog bat saritua izateko honako irizpide hauek baloratuko dira: euskararen maila, kalitate literarioa, diseinua, gaurkotze maila eta originaltasuna. Azken irizpide horren harira, blog originalenak ere bere sari berezia izango du.

·Sariak honakoak izango dira:
Blog pertsonal onena: 300 euro
Taldeko blog onena: 300 euro
Blog tematiko onena: 300 euro
Blog originalena: 300 euro

·Lehiaketan parte hartzeko epea urriaren 3an hasiko da eta azaroaren 21eko eguerdiko 13:00ak bitartean iraungo du. Zenbat eta sarrera gehiago egin hobe, epai-kideek jarraipena egingo baitute tai gabe. Ezin izango da beste blog bateko testurik kopiatu, izan ere, zuen originaltasuna baloratu nahi dugu.
• Blog batean beste pertsonekiko iruzkin laidogarriak edo kaltegarriak badaude, blog horrek ez du parte hartuko.
• Izen-ematea on-line egingo da, beren-beregi sortutako izen-emate orriaren bitartez. Izen-emate orrian eskatzen diren datuak beteko dira eta bloga deskribatuko duen irudi adierazgarri bat .jpg artxibo batean (150 x 100 pixel eta 150 kb-ko pisua gehienez ere) bidali beharko da. Bidaltzeko arazorik izanez gero edo, besterik gabe, zure bloga sarean ikusten ez baduzu, jarri harremanetan gurekin. (bilblogari@bilblogari.net)
• Datu Pertsonalak Babesteari buruzko abenduaren 13ko 15/1999 Lege Organikoarekin bat etorriz, jakinarazten da erabiltzaileak ematen dituen datu pertsonalak Bezero, Erabiltzaile eta Hornitzaileen fitxategian sartuko direla, eta fitxategi horren arduraduna EDE Fundazioa dela (Simón Bolivar 8b. 48010 – Bilbao – Bizkaia). Sartutako datuak helburu bakarrarekin erabiliko dira: erabiltzaileen eskaerak kudeatzea eta eskainitako zerbitzua ematea. Erabiltzaileak bere datuak kontsultatu, zuzendu eta ezeztatu ahal izango ditu, eta datu horien aurka ere egin ahal izango du, mezu elektroniko bat bidaliz bilblogari@bilblogari.net helbidera.
• Abenduaren hasierako egunetan, epaimahaia (blog-etan adituak diren bi pertsona) bilduko dira irabazleak aukeratzeko, eta azkenik, irabazleak iragarri eta sariak emango dira data horren inguruan. Sari banaketan zehar argazkiak egingo dira, webgunean argitaratuko direnak.
• Lehiaketan parte hartzeak esan gura du egileak oinarriok onartzen dituela.

Informazio gehiago: www.bilblogari.net