• Spanish
  • Euskara
sexo, drogas y Rock & roll

“SOSAK JOKATU”
Joko patologikoa; ludopatia edo jokoa arazoa denean

juego

Zer da?

Bingoak, kasinoak, makina txanponjaleak, loteriak, kirol apustuak, lineako jokoak… Horiek guztiek, eta beste askok ere bai, ekar dezakete berez joko konpultsiboa, neurrigabea, arriskutsua. Horietako batek ere ez zaitu aberats egingo; bestela ez legoke negoziorik.

Jokoaren mende jausiko gara, horretarako gorde ez dugun dirua neurriz gora eta kontrolik gabe xahutzen dugunean, berreskuratzeko posibilitaterik gabe eta horrek ekarriko dizkigun ondorio txarrak ezagututa ere.
Denbora aurrera joan ahala, gero eta asti, indar eta diru-kopuru handiagoa emango dugu jokoan.
Jokoaren menpean gaude eguneroko bizitzari aurre egiteko unean.

Jokoa dela-eta pilatutako zorrengatik diru-arazoak edukiko ditugu eta dirutza irabazteko ameskeriak egin ere bai. Kontrolik ezak eta gastuak arazo larriak sortuko dizkigute bai ekonomian, bai familia eta lagunekin ere.
Joko-adikzioa izan ohi da suizidio-ahalegin gehienen kausa.

Hainbat joko mota

Ausazko jokoa

Dirua arriskatzen duzu.

Emaitzak etorkizunean edo zorian oinarritzen dira, jokalariaren trebezia maila dena delakoa ere.

Sariak daude, dirutan edo gauzatan.

Estres, antsietate, frustrazio, porrot eta traizio sentimenduak eragiten ditu.

Doako jokoa edo dibertimenduzkoa ez dira ausazko jokotzat hartzen.

Legez kanpoko jokoa

Ez duzu legea betetzen.

Legez kanpoko lineako joko-gune batean sartzen bazara, zeure dirua eta zeure datu pertsonalak arriskuan jar ditzakezu, iruzurra edo engainua egin diezazuke, jardunbide bidegabeak izan ditzakezu eta erakunde kriminalekin lankidetzan aritu.

Hori saihesteko, lineako joko-operadore lizentziadunen zerrenda izan behar duzu gogoan. Espainian legezko lineako jokoa eskaintzeko lizentzia duten operadoreek .es domeinuetan eskaintzen dituzte zerbitzuak.

Joko segurua

Jokoa bidezkoa, osoa, gardena eta fidatzekoa da.

Jokoa operadore legezkoen webguneetan baino ez da segurua, operadoreek abantaila hauek ematen baitituzte:

  • Joko-arau argi eta gardenak eta horien berri izateko eskubidea.
  • Joko zintzoaren bermea, tranpa eta iruzurrik gabe.
  • Gordailuen, ordainketen eta kobrantzen segurtasuna.
  • Parte-hartzailearen identifikazioa: nortasuna eta adina egiaztatzea, adingabeei sartzen ez uzteko.

Jokalari motak

Arduratsua

Jostatzeko eta entretenitzeko jokatzen du, ez dirua irabazteko.

Badaki zortea izan dezakeela eta dirua irabaz dezakeela, baina onartzen du galtzeko aukera ere badagoela.

Kontrolatzen ditu jokoan eman nahi duen denbora eta galdu dezakeen dirua.

Erantzukizunez jokatzen du eta esperientzia atsegina eta dibertigarria lortzen du, bere buruari, familiari edo lagunei kalterik egiteko arriskurik gabe.

Arazotsua

Ez du entretenitzeko jokatzen, beharragatik baizik.

Jokoaren ondorio negatiboak agertu eta areagotu egiten dira.

Patologikoa

Jokoarekin lotutako portaeraren kontrola galtzen du eta horrek ondorio negatiboak dakartza bai berarentzat bai inguruarentzat.

Jokatu nahi duen ala ez erabakitzeko askatasuna galdu du.

Jolasa ezinbesteko beharra da eta haren bizimodu indibiduala, familiakoa eta soziala hondatzen ari da.

Aholkuak

Hala ere jokatu nahi baduzu, baina modu arduratsuan eta arazoak saihestuz:

  • Mugatu jokoari eskainitako aurrekontua. Aurrekontu horrek zure aukerekin bateragarria izan behar du eta konpromiso irmoa egin behar duzu gaindituko ez duzula.
  • Linean jokatzen baduzu, erabili gordailuei muga jartzen dieten programak.
  • Ez luzatu jokatzeko denbora.
  • Ez eskatu dirurik maileguan jokatu ahal izateko.
  • Ez jokatu galdutakoa berreskuratzearren.
  • Ezar itzazu eguneko, asteko edota hileko mugak.
  • Atsedenaldiak hartu.
  • Arazoak izaten hasten bazara, saia zaitez eguneroko ohiturak aldatzen, egin jarduera fisikoa, lortu denbora-pasa berriak, irakurri, zoaz zinemara edo lagun berriak egin ditzakezun lekuetara…

Joko-adikzioa izango duzu, honako hauek gertatzen bazaizkizu

Jokoak plazer berezi eta bizia eragiten dizu, beti martxan jarriko bazintu bezala.

Jokoak adiskide edo familiarekiko harremanak oztopatzen dizkizu.

Jokatu ondoren damu zaizu eta errudun edo haserre sentitzen zara.

Familia edo lagunei gezurra esaten diezu, zure bizitzan jokoa zein garrantzitsua den ezkutatzeko; apustu edota jokoen ordainagiriak eta mezu elektronikoak ezkutatu eta laneko zein beste helbide elektronikoren batera desbideratzen dituzu.

Gero eta diru gehiago gastatzen duzu eta gero eta sarriago egiten duzu apustu.

Galdu eta berehala itzultzen zara jokatzera berriro, galdutakoa berreskuratuko duzulakoan.

Dirua maileguan eskatzen duzu, jokatzeko edo jokoaren zorrak kitatzeko.

Aurreikusi baino denbora gehiago ematen duzu jokoan.

Arazoetatik ihes egiteko edo urduritasuna, depresioa edo asperkeria arintzeko jokatzen duzu.

Jokoaren eraginez nekez lo egiten duzu.

Dirutza galdu arren edo azken txanpona galdu arte segitzen duzu jokoan.

Jokoa dela eta, ez dituzu eginbeharrak betetzen.

Lagunak txunditzeko jokatzen duzu; irabazitakoaz harro hitz egiten duzu, galdutakoa aipatu barik, noski.

Beste zerbaitetarako zen dirua erabiltzen duzu jokatzeko; zeure soldata edo familiaren dirua xahutzen duzu.

Jokoa dela eta, deprimituta edo kezkatuta zaude; irabaztean aldarte aldaketa zakarrak dituzu; are zakarragoak galtzean.

Joko-adikzioak zerikusi handia dauka drogamendekotasunarekin.

Jokoarekiko mendekotasuna izan dezakezula uste baduzu eta zure bizitzaren kontrola berreskuratu nahi baduzu

Argi eduki behar duzu. Une horretatik aurrera dena hobetuko da.

Zeuk erabaki behar duzu uztea; ez egin inguruak eskatuta edo atsegin emateko bakarrik.

Laguntza eskatu: badira zure mendekotasuna gainditzen lagun diezazuketen zerbitzuak (publikoak edo pribatuak) eta elkarteak. Bertan, profesionalak aurkituko dituzu, bai eta zu bezala dauden edo egon direnak ere; horregatik, erraz ulertuko zaituzte, gaitzespenik gabe eta azalpen askorik eman behar izan gabe.

Erabil ezazu autodebekua. Kasinoetarako, bingoetarako eta lineako ausazko jokoetarako sarbidea murrizteko eskaera egitea da helburua. Horrela, joko-operadoreek ez dizute publizitate-komunikaziorik bidaliko, ezta ekitaldietarako gonbidapenik ere. Ludopatiari laguntzen dion elkarte batek lagundu diezazuke izapidetzen eta polizia-etxeren batean ere eska dezakezu.